أول مرة بفوت على فرع أمن كنت صف عاشر :
(لا تطلع لاهيك ولاهيك وراسك بين رجليك )... هي أول جملة بسمعها بفرع الأمن العسكري بكفرسوسة بعد ما حولوني من مخفر القابون لهنيك لأني ( ضيعت هويتي ) أول يوم حطوني بالكاريدور .. 3 ساعات وبعدين قلعوني لتاني يوم أجيت تاني يوم .. طمشوني وسمعوني نفس الجملة . وبعد6 ساعات قلعوني لتالت يوم باليوم التالت فوتوني على غرفة وأنا مطمش بس مالي مكلبش وأول سؤال سألني ياه المحقق .. بتصلي ... ماجاوبت فكرت السؤال مو ألي .. كرر :
* بتصلي
*أي
*بأي جامع
* بجامع الهداية
* هاد شيخو مطلوب
* ( مافهمت ) صمت .
*كل يوم بتصلي بالجامع .
* الجمعة وتنين خميس .
* كل هاد !! ... بتاخد حلقات دين .
* دروس ؟؟ أي .
*حافظ نشيد البعث
* قلتلو النشيد الوطني
أكلت كف ... شلت الطماشة
*ليش شلت الطماشة ولاك
* بدي شوف مين عم يضربني .
*صفن .... قلي لمين بايع الهوية ولا ...
* ليش الهوية بتنباع ؟
* بقديش بعتها .
* مين بيشتري هوية ؟؟ شلون ممكن يشتريها . بعدين ليش ضربتني ؟
* منشان ماتضيعها مرة تانية انقلع . طلعت وشفتن جارين شب من رجليه بالكاريدور آكل قتل لميت ونزلوا على الدرج وهنن ساحبينو من رجليه وراسو عم يخبط بكل درجة ...
منيح ألي ضيعت هويتي وفتت على الفرع لأنو بعدها قريت عن مجزرة حماة.. هنن خلوني أعرف شو يعني انقلاب الأسد الأب . واقرأ عن مجزرة سجن تدمر . بعتوني عفرع أمن وأنا صف عاشر لخاف منهن .. لوطي راسي بس شوفن .. لأحسب حسابهن بكل شي . لقول أمرك سيدي .... ليزرعو فيني شي ... يمكن لأحقد عليهن وخاف منهن .
طبعاً ضيعت هويتي مرتين بعدها بالحادي عشر وبالبكلوريا.
و من آذار 2011 ضربوني ووقفوني اعتقلوني بنفس الفرع للصدفة بس ما عرفوا أني لقيت هويتي ألي مابتضيع .
ليست هناك تعليقات:
إرسال تعليق